وزیراعظم عمران خان دی زیر صدارت قومی رابطہ کمیٹی دے اجلاس دے بعد معاون خصوصی اطلاعات و نشریات ڈاکٹر فردوس عاشق اعوان دی میڈیا کوں بریفنگ

وزیراعظم عمران خان دی زیر صدارت قومی رابطہ کمیٹی دے اجلاس اچ وزیراعلی سندھ مراد علی شاہ دی درخواست تے کورونا وائرس دے کھنڈنڑ تے عوام دی جان و مال‘ روزگار دے تحفظ کوں یقینی بنڑاونڑ کیتے مستقبل دے فیصلے ہک ڈینھ کیتے موخر کرڈتے گئن ‘ وزیراعظم عمران خان وزیراعلی سندھ کوں ہدایات ڈتن جو او منگل کوں این سی سی دے اجلاس اچ ہک جامع روڈ میپ گھن آون جیں اچ پسماندہ علاقیں‘ کچی آبادیاں اتے محنت کشاں دے حقوق دے تحفظ دی جھلک نظر آوے ‘ وزیراعظم صوبائی قیادت کوں ہدایات ڈتن جو او باہرلے ملک اچ پھسیے پاکستانیاں دی واپسی کیتے اپنڑے ایس او پیز بنڑاون ‘ ایمرجنسی کیش پروگرام دے تحت رقم دی منتقلی دے عمل اچ صوبائی قیادت کوں شراکت دار بنڑایا گئے
اسلام آباد ۔ 13 اپریل (اے پی پی) وزیراعظم عمران خان دی زیر صدارت قومی رابطہ کمیٹی (این سی سی) دا اہم اجلاس سنوار کوں اسلام آباد اچ منعقد تھئے وزیراعلی سندھ مراد علی شاہ دی درخواست تے کورونا وائرس دے کھنڈنڑ تے عوام دی جان و مال‘ روزگار دے تحفظ کوں یقینی بنڑاونڑ کیتے مستقبل دے فیصلے ہک ڈینھ کیتے موخر کرڈتے گئن ‘ وزیراعظم عمران خان وزیراعلی سندھ کوں ہدایات ڈتن جو او منگل کوں این سی سی دے اجلاس اچ ہک جامع روڈ میپ گھن آون جیں اچ پسماندہ علاقیں‘ کچی آبادیاں اتے محنت کشاں دے حقوق دے تحفظ دی جھلک نظر آوے ‘ وزیراعظم صوبائی قیادت کوں ہدایات ڈتن جو او باہرلے ملک اچ پھسیے پاکستانیاں دی واپسی کیتے اپنڑے ایس او پیز بنڑاون ‘ ایمرجنسی کیش پروگرام دے تحت رقم دی منتقلی دے عمل اچ صوبائی قیادت کوں شراکت دار بنڑایا گئے ، صوبائی حکومتاں ضلعی انتظامیہ دے ذریعے سماجی فاصلے تے کورونا وائرس دے کھنڈنڑ دی ایس او پیز تے پورا عمل درآمد یقینی بنڑیندیاں پئن ‘ وزیراعلی سندھ وی اپنڑے انتظامی اختیارات استعمال کرن‘ وزیراعظم ساریاں اکائیاں اتے ایندے اچ وسنڑ آلیں دے بنیادی حقوق دا تحفظ یقینی بنڑاونڑ کیتے ڈینھ رات کوشاں ہن ‘ سندھ دے عوام وی پاکستانی شہری ہن انہاں کوں وی بھک‘ بے روزگاری اتے غربت توں کڈھنڑاں اے ۔ وزیراعظم عمران خان دی زیر صدارت قومی رابطہ کمیٹی (این سی سی) دے اجلاس دے بعد میڈیا کوں بریفنگ ڈیندے ہوئیں وزیراعظم دی معاون خصوصی اطلاعات و نشریات ڈاکٹر فردوس عاشق اعوان ڈسائے جو وزیراعظم دی زیرصدارت این سی سی اجلاس اچ اتفاق پاتا گئے جو مستقبل دے فیصلیں کوں ہک ڈینھ کیتے موخر کیتا ونجے ۔ وزیراعلی سندھ مراد علی شاہ ولوں درخواست کیتی گئی جو کنٹسٹریکشن دے شعبے اتے ضروری چیزاں کھولڑں دے اقدامات دے اعلان توں پہلے کجھ وقت ڈتا ونجے تاں جو ہم آہنگی نال فیصلیں تے عمل درآمد یقینی بنڑاﺅن ۔ وزیراعظم وزیر اعلی سندھ دی اے درخواست منظور کریندے ہوئیں ڈو سوال انہاں دے سامنڑے رکھیے جو لاک ڈاﺅن کوں جاری رکھنڑ دے اثرات محنت کشں اتے مزدور تے کیا اثرات تھیسن ، گھٹ خطرے آلیاں صنعتاں مرحلہ وار کھولنڑ کیتے لاک ڈاﺅن کوں جزوی لاک ڈاﺅن اچ بدلنڑ دے کیا اثرات ہوسن ۔معاون خصوصی ڈاکٹر فردوس عاشق اعوان آکھیے جو امید کریندوں جو وزیراعلی سندھ اج منگل کوں قومی رابطہ کمیٹی دے اجلاس اچ ایجھا لائحہ عمل پیش کریسن جیں اچ کہیں ایلیٹ کلاس دی بجائے محنت کشاں‘ مزدوراں اتے پسماندہ علاقیں دے عوام دے حقوق دے تحفظ دی جھلک شامل ہو سی۔ انہاں آکھیے جو بدقسمتی نال یکجہتی اتے ہم آہنگی دی فضاءکوں سبوتاژ کرنڑ دی کوشش کیتی گی ‘ وزیراعلی سندھ قومی رابطہ کمیٹی دے اجلاس توں کجھ گھنٹے پہلے لمبی پریس کانفرنس اچ اپنڑے تحفظات دا اظہار کیتے ۔ معاون خصوصی ڈاکٹر فردوس عاشق اعوان وزیراعلی سندھ کوں الویندے ہوئیں آکھیا جو وزیر اعلی صاحب ! قومی رابطہ کمیٹی دے اجلاس توں پہلے ڈڈھ سلھ دی مسیت بنڑا تے میٹھا میٹھا ہپ تے کوڑا کوڑا تھو کرنڑ قومی یکجہتی کوں پارہ پارہ کرنڑ دی کوشش اے‘ اگر تساکوں کہیں پالیسی یا فیصلے تے تحفظات ہن تاں انہاں کوں این سی سی اچ زیر بحث گھن آﺅ ۔ وزیراعظم ہک ویلھے ڈو محاذاں تے لڑدے پئن ہک پاسے کرونا کوں ہراونڑ ‘ عوام دے جان مال اتے زندگی دا تحفظ یقنی بنڑاونڑ کیتے قومی بیانیہ اتے حکمت عملی نال اگوں ودھدے پئن تاں ڈوجھے پاسے لاک ڈاﺅن پاروں گھراں اچ بیٹھے ڈیلی ویجز کوں غربت افلاس‘ بے روزگاری اتے بھک توں بچاونڑاں اے ایں کیتے متبادل حکمت عملی دے تحت لاک ڈاﺅن کوں جزوی لاک ڈاﺅن اچ بدلیندے ہوئیں گھٹ خطرے آلیاں صنعتاں کوں مرحلہ وار کھولنڑ دے پاسے ویندے پئن ۔ معاون خصوصی ڈاکٹر فردوس عاشق اعوان آکھیے جو وزیراعلی سندھ اکھیندن جو ایمرجنسی کیش پروگرام دے تحت کیش گھننڑ کیتے آونڑ آلا ہجوم کرونا وائرس کھنڈنڑ دا ذریعہ بنڑ سگدے ‘ دراصل مستحق اتے نادارلوکاں دی ایں ویلھے مدد ساریں توں اہم اے تے وزیر اعظم ایں ضرورت کوں پورا کرنڑ ویندے پئن ایندے اچ صوبائی حکومتاں شراکت دار ہن ، وزیراعلیٰ سندھ وی اپنڑے انتظامی اختیارات کوں استعمال کریندے ہوئیں اتھاں وی سماجی فاصلے کوں یقینی بنڑاون۔ معاون خصوصی ڈاکٹر فردوس عاشق اعوان آکھیے جو وزیراعلی سندھ کوں اگر کوئی گلہ شکوہ اے یا تحفظات ہن تاں او میڈیا سکرین دی بجائے 24گھنٹے وزیراعظم نال رابطہ کرتے صوبے دے عوام دی ریلیف تے گال کرسگدن ‘ وزیراعلی سندھ دی پریس ٹاک نال اے فضاءبنڑاڈتی اے جو وفاق جواب ڈیوے ‘ اساں نئیں چاہندے جو شکوہ جواب شکوہ دا سلسلہ شروع تھیورے اے شکوہ جواب شکوہ کرونا دے خلاف قومی مہم کوں متاثر کریسی ۔